ليلة البارح بغي الذيب يطمر في القليب
طمرةً لو إنها حاصلة ياشينها
أدري إن العمر مكتوب والصادوف غيب
والحياة أقدار ماشينها ماشينها
وأدري إني لا تهورت من كلش قريب
غير شيء يخلف المرجلة ويهينها
ضيق الله الصدر من ضيق الصدر الرحيب
لين ما جاب الله اللي تجي في حينها
يوم ضاع الشور بين الملازم والرقيب
حولت بنتً تشوف السعد في عينها
شيخةً ما هيب من نسل شباب وشبيب
بس أكيد إن قيصر الروم من جدينها
عبقرية طيب وتحارب اللي ما يطيب
والنظام تحط راسه تحت رجلينها
أعجبتني وأنا معاد يعجبني عجيب
فتنه بسلطة ذكاها وسلطة زينها
رهبت الموقف بعدها طلع جداً رهيب
يا حلو نور السفاتي على خدينها
قالت أنت الظاهر إنك من الغرب الصويب
قلت لا بالله ضاري على روتينها
من صغر سني وأنا أدور الفرحة وأغيب
علموني وينها فيه .. مدري وينها؟
ودي أستمتع بدنياي قدام المشيب
يكفي اللي ضاع من قبل في عشرينها
الوكاد الله يقديني الدرب المصيب
واخذ آمالي وهي راضيه بيدينها
وأرجع لدارٍ من يخونها مقطوع صيب
من جحد فضل إنخلتها عرف سيفينها
يا غريبة جمّل الله حالك فالغريب
عندك إنسانية الناس مفتقدينها
يتحير فيك حتى المثقف والأديب
تجهلين أخلاق الإسلام وتسوينها
أنا والله لو ما شفت سلسالك الصليب
كان خليتيني أقول ينصر دينا
