يا عذاب اللي هقاويه وأحلامه كبار
يحسب الدنيا تراعي شعور الطيبين
ما يبي العالم يشوفون فيه الانكسار
مبتسم والابتسامات من طبع الحزين
الزمن دوار .. وأنا نشدته يوم دار
قلت له ليه تدور قال انتظر ما درت زين
عايش الحرية اللي ما هي بعند الأحرار
من كثرت ما اسرفت فيها شعرت اني سجين
بين حرية تصرف وحرية مسار
جاي رايح جاي رايح تعبت اعطي منين
ما قدرت أستوعب الوقت ذا وشلون صار
وما قدرت اواكب الناس من سرع السنين
اتركوني ودي اخذ نفس واخذ قرار
وأتأمل لين اعرف الطريق الصح وين الصواب
عياله أهل الصبر والانتظار
والخطأ لإبليس وعياله المستعجلين
وقفوا بالله ركب المطايا والمهار
يا رياجيل احتروني وراكم مسرعين
صكت الصكات راسي جعل راسي مجار
من معانات وظروف وبقايا راحلين
ودي اطلع في خلى نجد وافك زرار
وأسدح بصوتي واغني على واحد اثنين
كثرة الاصحاب ما عاد منها إلا الدمار
واكثر الناس استخفوا مع المستسخفين
اتعجب من سواليفهم ليل ونهار
كل ابوها ما تنومس وهم متنومسين
الثناء والشكر لله على كبر الوقار
في عيون اللي يعرف الخفيف من الرزين
من تفاهات العقول وسخافات الصغار
ما طلع لي شيب لحيه طلع لي شيب عين
فاهق عمري عساني من طول العمار
اربعيني ولو ماني بحول الأربعين
يمكن اكبر معضلاتي محب الاختيار
ودي انها كل ابوها تجي دنيا ودين
أنا عندي ضغط نفسي ومالي بإختصار
ولو تزين شوي نفسياً الباقي يزين
نضحك ونشري ونبتاع في البلوى العقار
مشت بالدين والا لعنت الوالدين
