يالله بحظ منتهض متعلي
ولسانٍ ليا زلت النفس ما زل
الشعر ما أعتبره وسيلة تسلي
أعتبره إن جا لازمه سيف يسل
مقل في وصله وجايز لي
ما فيه شي أحلى من الوصل لا قل
ما نيب لا نادني أجيه كلي
وإن جيت خلاني مبدا على الكل
ما جابته أمه من بياخذ محلي
لا من هل الأضواء ولا من هل الظل
يا مل قلبٍ ما سلم منه ملي
وحبايبه ما مل منهم ولا كل
قلت إنت ما مليت من حب خلي
قال إنت مل إن كان تقدر وأنا امل
أنا مولي شايل لي مولي
كل يبا الثاني يدله ولا دل
يلعب بنا سر الجمال المحلي
الحلوة أكثر مشكله مالها حل
أنا مصلي والغضي ما حصل لي
يا راعي البيت المقوّل تب وصل
الله لطيف بعبده المذنب اللي
إذا سجد يرتاح وإذا عصى ذل
عسى ضياعي فالمحبة إفدا لي
وعسى الظروف تقرب الخل للخل
البعد يرهق والسهر ما يخلي
غير الخيال اللي يخليني اختل
حبيبتي لايق عليك التغلي
النرجسية فل لان الحلى فل
لا شفت طلتك بغرور وتجلي
ذكرت ليلة في مضى ليلك اضل
رغم الجفا لا زال قلبي يهلي
ولا زلت منتظرك متى ما الزعل زل
وإذا فقدتك قبلها فاقدٍ لي
عقل سرح في عيونك وتلته تل
