يا مرخصين القصيد بدقه الشيله
يا قرب مركاضكم يا بعد مركاضي
أنا اعشق الشعر وأبحر في تفاصيله
وابشره دايم أن اغراضه أغراضي
لا صرت عنده ما يشكي من غرابيله
تقول عمهوج في يمنى ولد عاضي
عذوبته سر تقديره وتبجيله
وتركيبه اهم من موسوعه ألفاظي
الشاعر يبان لو يجيب تفعيله
حتى عن الوزن للحساس متغاضي
اللي يشوف الحزين ولا يمشي له
ماهوب سني ولا شيعي ولا أباضي
ابن آدم ضعيف لو إنه ولد جيله
لاضاق صدره تضيق السبع الأراضي
واللي مزعلني إني فاقد اصيله
راحت وخلت زعلها مطرقه قاضي
وانا سخي مير عزة نفسي بخيله
قالت لي أحب ما قالت لي أراضي
يا ليل يا عين يا دنيا من إنتي له
ما جت على بال شاعرها على الفاضي
الوقت ما دام للي ما برد حيله
يفوز مره ومره ينهزم راضي
يا صاحبٍ كل ما يشكي لي ابكي له
لا عاد تستوقظ جروحي وأنا قاضي
سولف عن القابلة ولّا عن الليلة
لا تطري الماضي الله يقلع الماضي
