مترف وزايد جماله
يا حلاه ويا دلاله
صاب قلبي منه نظره
يا عسى روحي فدا له
كل ما شفت ابتسامه
زاد في قلبي غرامه
هو ضيا ليلي و بدره
وأتأمل في كلامه
لو حكى والصوت هادي
صوت ما هو صوت عادي
ينعش إحساسي بنبره
سارق مني فؤادي
في لقاه البال رايق
كنّ ساعاته دقايق
مبعد همي بكبره
وأبتسم لو كنت ضايق
قربه وشوفه غناتي
بعده الحزن وشتاتي
فيني إليا غاب عبره
مرة تنكد حياتي
مقدر آزعل كيانه
همي رضاه و أمانه
وإن زعل أو ضاق صدره
ازعل الدنيا عشانه
شوق قلبي ماهدا به
كيف لو طول غيابه
حالتي لا غاب خطره
واحد و ماله مشابه
عشقنا دام بوفانا
نترك الحاقد ورانا
ينقهر ويموت حسره
ما يأثر في غلانا
راسم فالقلب رسمه
حظ قلبي له وقسمه
ما بقى فالدم قطره
تجري إلا له ول اسمه
