أستكن الليل والعاشق تنبه
والجريح بنوم عينه ما تهنا
والهوا ذعذع نسيمه من مهبه
والحمام اللي على الاغصان غنا
وإنت ياللي لا تعاض ولا تشبه
أمسح الدمعة من عيون المعنا
وارحم اللي طاري الفرقا لعب به
يتوجد ويتردد ويتمنا
آه يا شين الهجر بعد المحبّة
واح يا هم ورا صدري تبنا
حبنا في بعدك اللي مانحبه
وأشتحن ولغير قربك م اشتحنا
وإنت قلبك فالهوا يا زين أربه
ما عشق في بعدنا شخص بدلنا
إنت جرح اللي يحبك وإنت طبه
الوحيد اللي له القلب يتعنا
طف جمر الشوق تكفى لاتشبه
لا يصير الوقت منا وإنت منا
يا عيون الحر الأشقر في مربه
ياليان العود لا قام يتثنا
لب صوتي كل ماناديت لبه
واقرب وقرب لي الكف المحنا
لا تجي من صوبنا جية مشبه
ولا تعذر بالظروف ولا تونا
بيننا ما للجفا يا زين سبه
الله الله فالوصل لا تمتحنا
اذكرك واحن وأهوجس واسبه
منك حالي يا بعد حالي تدنا
كل يوم أمر مدهالك وأنبه
وأنعزل في سكته كني مجنا
والله ان دمع المحاجر ما يصبه
غير ذكرا بين كنت وبين كنا
