كلمات ارجع انت

ما يردّ القلب عن همّه وعن سطّوة جروحه
غير صبحٍ يعتق قلوب الحيارى صوت أذانه

فالرحاب اللّي تمدّ العزم للنفس الطموحة
كنّي آخذ من معالم مجدها .. حلم ورزانة

الجبل مالي عيون الناس من شدّة وضوحه
ما أخلفت فيه الرّياح الهوج شي من إتزانه

في ذراه .. يغنّي الشاعر طرب ويمدّ شوحه
بين فكرة من مخيّلته !.. وكلمة من لسانه

استعاد الرّوح من يوم استعاد الشّعر روحه
من يشوفه يحسبنّ الشّعر واحد من خوانه

البلا إنّه ، كلّ ما يبعد على البيدا .. شبوحه
ما يشوف إلّا رسوم أطلال من ماضي زمانه

العيون اللّي من اللهفة !.. مطالبها لحوحة
ودّها تبكي .. ولا أدري من تبي تبكي عشانه

صاحبي !.. ما مرّ يوم إلّا ، ولك جيّة وروحة
وش بقى غير الطّيوف اللّي لها قدر ومكانة

كنت أقول إنّ المشاعر عنك توبتها نصوحة
وأثرها عمرٍ ما يعطى فيه .. عهد ولا ضمانة

الغلا .. في كلّ يوم يطيح صرحٍ من صروحه
أدرِك اللّي باقي من الحبّ قبل يفوت أوانه

لا تحمّلك الخطايا !.. هم عذر ولا سموحة
ارجع انت .. وكلّ شيٍ فات يرجع في مكانه

محمد بن غرمان