تكفى لا تتركهم يصورون امي

لا تتركهم يصورون امي

يا سعد ياخوي لا يِذبحك همّي
أنا نطحتك الأُمور المصيريّه

كُلّ ماكلّمتك أجيك متحمّي
أنت في صوتك تنفّس وحرّيّه

ماني بأوصيك علَّم بني عمّي
لا تخلّي من ورى جدرها فِيّه

مقدر أحدّد ولا أنصّى ولا أسمّي
كلهم ربعي وربعي حماويه

قحطان مناصرين النبي الأُمّي
فزعة المضهود لا كبرت الهيّه

عزوتن تِرقابنا الشمّخ الشمّي
ونِتهزّع بالعزاوي رهاويه

ماهو بياكثر تكفى على فمي
كلّ تَكفى عندنا ذات أهمّيه

بس تكفى يا ابن عمّي يا ابن عمّي
لا تخلّيني وتتركني ضحيّه

تَكفى لا تتركهم يصورون امي
أنت سِتر أُمّي وسِتر السنافيّه

إن قدرتوها انجلّى همّي وغمّي
وإن عجزتوا قدرة الموت الإهيّه

ماهي بمحترقة الأرض مِن دَمّي
موتة حَسْنة ولا عيشته سَيّه

اتركوني ساتر وجهي بكُمّي
كَم طمعنا الموت وأرواحنا حيّه

وكم خذا عقلي نِدا ماهو بيمّي
واسحبوا جاري وهي تِرقِل لحيّه

وكم نهار يقدّم الزاد وأسمّي
وكأني أبصم لي على جمراء حيّه

ودّي أخفّي عليكم بعض همّي
وانفتح باب الخفايا الخُصوصيّه

الشاعر سلطان بن عباس ¹