طاح من جنبي حزام مجريني
إنتهت نسبة رجوعه وعقلانه
كان لا إحتجته لقيته مياميني
لين أخذه اللي خذا روس جدانه
لا انتهى وقت العزا من يعزيني
الله يكفي شر ذا الوقت وأحزانه
امتلا صدري كلام وفضت عيني
وما بقى شي ما اختل ميزانه
كان أشوف بوجهه الوازع الديني
مثل ما أشوف العشا بين حجانه
وكان ما يغلي اللي ماهو يغليني
حتى لو اللي مايغليني إخوانه
وكان في بيته وقلبه يراعيني
وأنا ماني بتردى على شانه
ودي إنه كل ما جاء يطريني
لين يطلق حاجبه وأطلق لسانه
اختلف عقبه نظامي وروتيني
مثل قصر طاح ركن من أركانه
راح مني ضامنا إنه بياتيني
مثل ما يضمن لك المؤمن إيمانه
والله لولا موته إن ما يخليني
بس هذي قدرة الله سبحانه
