خلوا بوي في حاله

هَنِي والله الّلي لا بشاعر ولا حسّاس
يمرّه كلام النّاس ما حزّ في باله

الّلي يحسبون الشاعر أسعد على أيّ ساس
الشاعر يجامل عندك ويصدّق حاله

لو إنّك تشوفه كلّ ما دقّه الهوجاس
وتثيّقل وزن مفتاح بينه وجوّاله

تكيّثرت قسمك في القصايد وفي الإحساس
وعرفت إنّ كثير الّلي يعانيه مقاله

تفاصيل شكل الآدمي ماهي مقياس
الأشكال يمكن ما توصل لك حاله

تعبت وتعبت من التظاهر بقوّة الباس
وأنا أخاف من كل اتصال ومن رساله

وتعبت أتجنّب كل كلمة وكل وقفه وكلمة راس
من الشايب الّلي يعدّك من أوسط عياله

يحنّك ولا ودّه يحرُمك من الهوجاس
ولا ودّه تخيب ظنونه ولا آماله

تعودت ما أصدم طيبين الرجا بالياس
ولا هو بكلّ الّلي تعوّدته أحتاله

أنا اطيب لي في ناس واخيب لي في ناس
أحبّ الجميل وعثرت الحظّ قتّاله

فإذا طِبت قولوا طاب سلطان بن عبّاس
وإذا خِبت أمانه خلّوا بوي في حاله

الشاعر سلطان بن عباس ¹