على مثلك أصافح وقتي وأهنيه
وأهني خافقي ولا إنت من مثلك
عجزت أوصف سما قدرك.. عجزت أوفيه
وش أبعاد السماء قل لي وأنا أوصف لك
هلا بك يا نسم روحي ويا لبيه
في قلب ما اعترف بالحب من قبلك
وش الحيلة في قلب محبتك تمليه
في شخص من غلاتك صار يشبه لك
تفاصيلك إهي ضعفي.. لا تسأل ليه
حنانك .. ضحكتك .. هيبتك وطيب أصلك
وصوتك كوكبي الوهاج وحسك فيه
إذا سولفت ياخذني وأسافر لك
وأنا يا سيد إحساسي ويا غاليه
فؤادي خيل ما ساسه سوى وصلك
يحبك حب يشب الحاسد ويطفيه
إلين يرمد وجعله فدى ظلك
هوانا ما تهزه ريح .. وللتشبيه
هوانا يا جبل ويش اللي يقدر لك؟
وغرامك يا خليفة قلبي وواليه
وطن وإحساسي به شعب فدى كلك
يا اسم من غلاه إن مرني طاريه
يراودني سؤال وده يوصل لك
أبي مثلك وش اللي ينهدا وأهديه
إذا إنت يا الغلا .. ما فيه أحد مثلك
