كلمات قصيدة المباني حامد زيد

كلمات قصيدة المباني

جابك الله من فراق ضيق صدور المباني
قبل للوحشة تزعزع بيتك الصلب وتبيده

بيتك اللي من رحلت وكل جدرانه تعاني
ما تحمل ينتظر شهرين وعيونك بعيده

الله العالم لو انك جيت متأخر ثواني
ما تشوف الا بقايا من حصاه ومن حديده

من عرفتك وانت ضايع من مواني لمواني
تاركاً قلبي مولع من وقيده في وقيده

ضاع عمري بس احد بهالليالي وتحداني
وانت لا تشبع غياب ولا انت خايف من نقيده

ودي اتحمد الله لك بالسلامه ما مداني
كل ما توصل برحله ترجع برحله جديده

دام تدري كل وجه غير وجه الله فاني
ياخي اكسب لك ثواب وخاف ربك في عبيده

كان فيني عيب قلي .. فيني العيب الفلاني
كان هرجي مزعلك في شي قلي لا تعيده

لعنبوك ان مت بيدك من يفكك من اخواني
لأحزنوا ربعي علي ومت .. شالي تستقيده

انت منت اللي عشقته .. انت اكيد انسان ثاني
كيف صرت بهالبرود وهالاحاسيس البليده

وين حبك للزعل .. وين العناد الأولاني
وين حنية زمان وفرحة العمر الرغيدة

وين ذاك اللي ليا اقبل ما يبات الا بأماني
وين راح اللي ليا اقفى مايروح الا فقيده

واحداً من جابه الله بس يآمر ويعصاني
الوحيد الله اخافه غصب وامشي معه سيده

ما بغيت اطيح بيده لين ربي بلاني
والا انا لو هي بكيفي مابغيت اطيح بيده

ذاك بس اليا من شفته يلخبط كياني
ذاك من نظره ينشف دم قلبي في ويرده

قبل اشوفه اجمع له احلى القصايد والمعاني
وان لقيته ماعرفت اقول له جمله مفيده

الف مره قبله اعده القصيده من لساني
ولعنبوه ان جيت عنده قمت اخربط في القصيده

امدحه وانا ادري انه لو تباطاني نساني
انطحه وانا اعرفه مجنون اعصابه شديده

من يسوي بي سواتك يالرهيف الاسمراني
من هو من الناس غيرك غلطته ترفع رصيده

من يقص جناح طيرك وانت اعز انسان جاني
كيف اخاف رماح غيرك وانت طعناتك سديده

ان تبعتك اتبعك من طيبي وواسع بطاني
والا انا لا جيت اكيد انسان تدري كيف اكيده

اقدر انزع لك ثيابي والبس ثياب الاناني
واقدر اطلع من عذابي والعب بدورك واجيده

وان بغيت اكسب رهاني بخسرك وبكسب رهاني
واخدعك باحساس كاذب واتحدى من يصيده

ابك انا لا شفت خلي حط غيري في مكاني
والله اني لاتركه وان صد لعشق سيد سيده

خل بضلوعك مروه واجبر بخاطر زماني
شوف غيابك شمسوي في حشاي ولا تعيده

خلي داخل حدود وامرح الليله باماني
اكذب في باقي وعودك واصدق بلحظه سعيده

فك قلبي من برودك لو تولع بالمحاني
عطني احساس بوجودك وخذ كل اللي تريده

ليه تصغر في عيوني وانت برقاب الغواني
كيف تستسهل طعوني وانت خابرني وليده

تكفى ليا قلت تكفى قوم الدنيا عشاني
لا تضيع من ايدني فرصة العمر الوحيده

جيت ما ابيك تحقرني .. جيت ابيك تعز شاني
جيت ابي فزعة ضلوعك من مشاعرك البليده

يعلم الله شفت منك ومن غيابك ما كفاني
كان ماتقدر تخفف هم قلبي .. لا تزيده

شوف غيابك وش سوى بالصدور وبالمباني
وانت تدري كيف كانت صدمة غيابك شديده

والله لو انك وصلت البيت متاخر ثواني
ما تشوف الا بقايا من حصاه وحديده

كلمات الشاعر حامد زيد
https://x.com/hamedzaidq8