وشفيك ساكت كاره الناس وشفيك
وأنت اللي في طيبك قبل تحتويهم
وشفيك حتى وسعة الصدر ما فيك
ساكت ولا أنت تسبهم وتهجيهم
مستسلم لصمتك والأحزان تبليك
ما أدري قهر أو خوف لا تبتليهم
هم خيبوا ظنك أو الحظ جافيك
ما عدت طايقهم ولا تشتهيهم
أفا علامك يا جبل وين أراضيك
من تبردي خابرك حسبي عليهم
أنت الكرم الطيب واسأل مخبيك
يومك تعاونهم ويومك تجيهم
ومن طيبك تشوف المغثة حواليك
وتقول يلا رحمتك وتهديهم
واللي رفعته من على القاع بإيديك
الحين شوفه ما يبيك ويبيهم
ما تذكره يوم إنكسر جاك يشكيك
ووقفت له وهو قبل ينتخيهم
الناس هم الناس تاخذ وتعطيك
إلا قليل يبين الطيب فيهم
لو حسوا إنك مقبل شي تغليك
ولو شافوا دموعك بحر وش عليهم
خلك مع الوافين تضحك لياليك
وأهل الرخا والمصلحة لا تجيهم
ولا تهدم آمالك وتقصر خطاويك
لو جات كلمة بالخطأ من حديهم
ورزقك لو إنه دونه الناس بيجيك
بدين رب الكون ما هو بديهم
