ابيات عن نكران الجمايل

نكران الجمايل لا يؤذي فحسب بل يعلمنا ان لا تعلق المعروف على أبواب كل قلب. ونحن في زمن بانت فيه المواقف تقاس بالمصالح وينسى المعروف عند اول منعطف وحينها يشتد الألم حيث تاتي الطعنه ممن احسنت اليه.
وهنا تضيئ ابيات شعرية صادقة تحكي مرارة الخذلان بعد الوفاء وتحسد وجع اعطى فقوبل بالجحود والنكران.

نكران الجمايل

يقول الشاعر محمد السكران ¹

من ينكرون الجمايل لايهمونك
وردود الافعال منهم لا تغاربها

حتى لو اعطيتهم وحده من عيونك
قالوا عطا عينه اللي ما يشوف بها

عيال الحمايل

يقول الشاعر حمد السعيد  ²

شلت من حمل السنين ولا عسرني
في حياتي غير نكران الجمايل

ما تغير مذهبي لكن كسرني
ضيعة المعروف في عيال الحمايل

مهما تسوي جميل

يقول الشاعر حمد البريدي  ³

مهما تسوي في الخلايق من جميل
يلغون تاريخك على سبة خطا

لكل حاجة في الزمن تلقى بديل
اصبر ولو صبرك على الجمره وطا

احداً ليا منه زعل ينشر غسيل
واحداً ليا منه زعل ستر وغطا

اعط السماح وخذ من العفو القليل
ترى الحياة بكبرها اخذ وعطا

ريشة في عجاجة

يقول الشاعر ناصر الرزيني ⁴

حنا على الخوة نسوق المواجيب
وان بارت الخوة ما حنا بحاجة

لوجيهنا قيمة ولصدورنا غيب
ما الله خلقنا ريشة في عجاجة

للطيب طيب وللمودة تراحيب
وللجد جد وللسماجة سماجة

ابعد عن اللي لبيا زعل ينكر الطيب
اللي تقلب عشرته مع مزاجة

دين الجمايل

يقول الشاعر حبيب العازمي ⁵

الدين ما هو دين المال
دين الجمايل لراعيها

ترى الجمايل على الرجال
اثقل من طويق تاليها

والا على الناكر المحتال
اثقل من الريش مافيها

منصدم

يقول الشاعر عناد الشيباني ⁶

انا منصدم في معظم اصحابي الغالين
ولا عاد باقي شئ ابنيه واهدمة

من اول بغيت اعطيهم عيوني الثنتين
اقول ابشروا بي كل ما احتجتوا الخدمة

واللحين ابي درب السلامة ولا ادري وين
تركت السريع وعارضوني مع الخدمة

حلالها لو ان الرفاقة لها تامين
يعوض جميع اللي خسرته من الصدمة

فزعة الطيب

تدري متى تندم على فزعة الطيب
لا شفت مردود الجماله نذاله

ما يذكر المعروف غير الاصاحيب
وما يجحد المعروف غير الحثالة

عزة النفس

ما نقدر نسوي مثل ما تسوون
تردنا عن فعلتكم تربيتنا

انتم عن مهونة النفس ترضون
وحنا لو اقفت عزة النفس متنا

نكران المعروف

الكلب لو تشقية ثلاثة ايام
يشوف معروفك ويحرس حلالك

وبعض العرب لو تكرمه عشرة اعوام
ينكر معاريفك لا جا مجالك

نكران العشير

تدري من اللي ما حسبنا له حساب
اللي مع الاقراب ياشين طبعه

يضحك حجاجة كل ما شاف الاجناب
ويعقد حجاجه كلما شاف ربعه

نبي السلامه!

ياليت الوجيه اللي هقينا باهلها خير
بقى لونها .. هو لونها في بدايتهم

عطيناهم الاكرام والحب والتقدير
وعطونا جروح ما تعالج بخيبتهم

شبعنا من العذر ومللنا من التقصير
ولا عاد نبغى منهم الا سلامتهم

بعض الابيات لم نتوصل الى شاعرها، نامل ممن لديه اي معلومات عن بعض الشعراء والذين لم نضف لابياتهم اسماء ان يزودونا بها مع مايثبت من خلال اتصل بنا

1. [↩]الحساب الرسمي في منصة اكس للشاعر محمد السكران
2. [↩]الحساب الرسمي في منصة اكس للشاعر حمد السعيد
3. [↩]الحساب الرسمي في منصة اكس للشاعر حمد البريدي
4. [↩]الحساب الرسمي في منصة اكس للشاعر ناصر الرزيني
5. [↩]الحساب الرسمي في منصة اكس للشاعر حبيب العازمي
6. [↩]الحساب الرسمي في منصة اكس للشاعر عناد الشيباني