جربت معك الطيب ما فاد وياك
الطيب ما ينفع مع اهل اللكاعة
ان جيتني من هناك .. جيتك من هناك
عندي على كل الدروب استطاعة
وكبرت ماني بصاحبك الاولي هذاك
راح الحماس اللي تبي واندفاعة
اول لا منك ازعلتني طحت لرضاك
لاني محب وفي المحبه طماعة
وذلحين احبك لكن اعرف سواياك
ودتني الخبره حدود القناعه
ماني بقايل ويش غيرك وش جاك
ماجاك غير ابشر وسمعاً وطاعة
غرك غلاك وكثر لبيه خلاك
تحسب قلوب الناس عندك بصاعة
تذكرني اتذكرك .. تنساني انساك
للوصل وصل وللقطاعة قطاعة
