يا يبه الغيم دنق من تدناقك
واستحى من وجعك وفكك الياقه
شف من طهر ماك وعذب رقراقك
واستحى من ضماك ومن تدفاقه
طال شيحك ويشمومك ودراقك
والمرض طالبك شوكة وعناقة
طاح دمعك لفوق وشعشع اشراقك
في سرير الصبر واحمرت احداقه
بوس رجلك وريح المسك بعناقك
ما يعادل علب حلوى ولا باقة
يا يبه لا يحسمك لوح براقك
يا عزيز الجوار ومحتمي الساقه
يا يبه وانت جلك طيب ودقاقك
لا امتلى الناس نمامة ونقاقة
نفس ميثاق جدانك وميثاقك
مشبعين السباع بحزة الفاقة
اسمهم لا دخل في مجلسً شاقك
يخرج البخل برجوله مع الطاقة
لاقهم بشت زهران الذي لاقك
حندروا في الزمان ونشفت ارياقه
يا يبه ساقك المبتور يشتاقك
وانت بيدك تحسس له وتشتاقه
لا انقصك شيء لا عابك ولا عاقك
يا يبه قيمة الإنسان بأخلاقه
دام ساقك لفعل الخير سباقك
منت للجنة الخضراء بسباقه
يا يبه لا طفشت وضاقت اخلاقك
واستضاق المكان وضاقت اخلاقه
قول في اذن الطبيب اللي بتر ساقك
انا من توقف الدنيا على ساقه
