ماني بنا بن باز أو بن عثيمين
عبدالمجيد عقاب عبدالله أدري
أنا سماحة مفتي الدمع والعين
والحزن لا استفتاني أفتي بمدري
مدري أروح لمين أو كيف أو فين
ادخل نفق وأخرج وانا فوق كبري
اللي طعن صدري بطعنات سكين
أهون من اللي طعنته وسط ظهري
لا قلت يارب دمعتي قالت أمين
ودمعتي توقف معي منذ صغري
يا وقت تعرفني وأنا عارفك مين
مسويين معرف ومفهم ومدري
قرفت من بعدين بعدين بعدين
وقرفت من بدري وبدري وبدري
الحال زفت الطين يا وقتي الطين
يا عام ميلادي ويا عام هجري
وش فيك ساري تو الأحزان بتزين
يا ليل تو الليل .. بتنام بدري
خذ نجمتك خذ ظلمتك معك الاثنين
وانا ودمعي ننتظر فيلم المصري
تضرب وتسبقني وتشكي على مين
يا حزني يا خواف تضرب وتجري
