إن عشقت اليوم عشته، وإن كرهته قلت غور
الثواني والدقايق والليالي ذالفة
نكره ونعشق وتبقى سنة الله ما تبور
رب شيء تكرهوا خير لكم من خالفه
بس فيه أشياء ليا من صرت كارهها معذور
ارتفع عنها ونفسي عن غثاها حالفه
أكره الرجال لا من صار نما من هذور
ما معه سدن بعيد ولا يحفظ السالفة
وأكره الرجال لا من طاوع أمات البزور
أرضٍ يرضا ويزعل لا زعلن مكالفه
وأكره الرجال لامن صار به نقص وغرور
فوق برج العاج يبني كبرياه التالفة
لو قرا شعر المعري ما نسا بعض السطور
كل بيتٍ فيه حكمه والحكم متخالفة
قال سيروا فوق سطح الأرض رفقًا بالقبور
ما أديم الأرض إلا للشعوب السالفة
وأكره الحكمة إذا قامت على الذلة تدور
مثل قول إن كنت ما تقدر عدوك حالفه
وأكره الدنيا ليا من قامت تعل الصدور
باعدت خل وخليل وفرقت متوالفة
قصيدة أكره الحكمة عبدالله علوش
