قبل لا نبدع جديد القاف وجزال المثايل
لا إله إلا الله المعبود مبدا كل قاله
رؤية محمد عظيمه كنها وبل المخايل
يرخص الرجال روحه لاجلها ما هو بماله
كله لعين الاسم جينا ومطلبنا الأوايل
ما نبي شوط بديل ولا نبي مركز بداله
بيض الله وجه ابن حثلين كساب الجمايل
يوم طور مهرجان البل بتحقيق العداله
والتحدي فالمزاين عسر ما هو بالسهايل
ما يغره غير جاهل ضيعوه أهل الجهاله
ما ورى بعض الوعايد والكلام إلا الفشايل
واحدن ما هو بقد القول مدري ليه قاله
ويش عذره يوم ثارت عجة الخيل الأصايل
شرهته على الشوير ومنته على رياله
الصياهد ما تبى إلا الكفو شيال الثقايل
ابلج يوعد و يوفي وإن حمى الشوط احتمى له
علموا نشمي لا منها وصلت خشوم الفتايل
يعتبرني مثل أخوه وعنده أقرب من ظلاله
نشمي اللي لاسمه الطيب على فعله دلايل
أشهد أنه نشمي اسم و فعل والتوفيق فاله
شيخ شمل أهل النظر والفعل في سبع القبايل
من رضى غصب عليه و من سكت ما له جماله
إن قنع والا أقنعه فالشوط لا جات الصمايل
لا خذا الأول عليه وبالتصاريح استوى له
علم اللي ممتحنا فالتواصل والوسايل
ويش عنده فالكلام اللي يقول ووش طراله
يتحدى ويتعدى ويتمادى بالرسائل
ما ينافسنا الوكيل اللي مفوض بالوكاله
من طلبنا للتحدي لا يغايب ويتحايل
يتقدم ويتحدانا برأسه و بحلاله
اعلنوا حالة طوارئ شوطنا فيه الهوايل
من يبي درب السلامه ينفذ بماله وحاله
من حضر معنا يشوف بعينه نجوم القوايل
المنصه لا حضرنا مقبره ما هي بصاله
ندفن أحلام المنافس حي و عيونه تخايل
ما له إلا الحسره وصفقة يمينه في شماله
جات رؤية نشمي اللي بالنظر صايل و جايل
مضربه فالفردي أخلفكم و فالجمل الكماله
جات صفرن نخبويه ساقها يابس بلايل
كل مفروده بقيمة فله ولكزس وكاله
اتفقتم فالخفى والسر من كل الفصايل
واجتمعتم ضد نشمي وانتصر نشمي لحاله
فوزنا واحد ولا هي بيننا والشك زايل
فوزنا لمطير فوز وفعلنا لمطير طاله
كلمات حالة طوارئ الجفراني
