قصيدة والا بكمل لحالي

على مقامٍ يِدهلّه كلّ قِرناس
يقول مَن عَدّى على راس عالي

اللّيله هذا ليل مِسرى وهَوْجاس
قد شِفت وجهٍ في قديم اللّيالي

بدايته نكبه .. وتاليته إفلاس
وأنا مُولّي يا الرفيق الموالي

في خاطري لِجّه وفي عيني نعاس
وقلبي ما يِرحم ضيقتي وانشغالي

شفني تَعبت من المشاعر والإحساس
ومن واقعٍ تحت تَصرّف خيالي

ومن شُبهة الفَرحة ومن كَتمة اليأس
وكذبي على نفسي وصِدق انفعالِي

راحت سَنة وأنا بعِزلة عن الناس
مسوّي بروفه لحَفل اعتزالي

المُجتمع حسّاس والوضع حسّاس
وأنا على نِيّاتي وطيب فالي

كثّرت من هَيّن وعادي ولا باس
وقصّرت في حَقّي وطوّلت بالي

كنّي لَهَب من حولي الناس جَلّاس
أنا أحرِق وقلوبهم ما تِبالي

حتى هذاك مُعَرَّب الراس والسّاس
لو قلت كيف الحال؟ شَكّ بسؤالي

يِشاَوِر إبليسه ويعطيه وِسواس
ويجرجره مع حزبه الانفصالي

يِدّور الشهرة لو إنها بِتِكساس
ولا عنده إلا ثوب والثوب خالي

وتَبّاعة الشهرة ولَكّاكة الكاس
سوى سوا ما فيهم أوّل وتالي

ولا بمبادِيهم مَعزّه ونُوماس
على حسب حاجتهم تِصير خالي

تعرّضوني بكلمة بين الأقواس
وعرّضتّها مَتن الهبوب الشمالي

أطمر وإذا وصلت لتدنيقة الراس
والله ما أدارِي لوم عَمّي وخالي

أقطع علاقتهم مثل قَطع الأنفاس
مجاملة الرّدّيان ماهو مجالي

عاد إنت ياللي لك ورا الصدر مِجلاس
يِفدا وُقوفك راس وراس مالي

على الطريق اللي يِهابونه الناس
كمّل معي .. والا بكمل لحالي

الشاعر حمود ابو عوينه ¹