قصيدة راسي المزحوم

راسي المزحوم

ساري والليل ياخذ من دموع العين كيفه
لاهو اللي هزّ فنجاله ولا .. شحّت دلالي

كيف اشح وبوي ماقد شح يوم بحق ضيفه
ويش عذري من نباه ويش عذري من عيالي

اكتفيت بعزلتي عن ضجّة الدنيا السخيفه
ولا اعتزلت الذكريات اللي تجي لاصرت سالي

اطلب من الوقت ضحكه مثل من يطلب رغيفه
من حداه الجوع للي لا يروف ولا يبالي

كم شجيع ترتعد منه العرب لاسل سيفه
خلّته بقعا يعيش اليوم مطواع موالّي

ليت قلبي يشبه لـ روس الضلاعين المنيفه
و ليت في راسي المزخوم يوجد ربع خالي

كنت احسب ان المحبه ظل واغصانٍ مريفه
ولا وعيت الا وانا من حزني اجفل من ضلالي

سامح الله رمشك اللي فيه امان وفيه خيفه
كل ماصلّي عطاني من جحيم الشوق صالي

انكسرت وكسرتي والله على مثلي كليفه
وصرت مثل الجالي اللي يستجير فوجه جالي

جرح هجرانك الى ذلحين ماوقف نزيفه
دايم الغالي يجي جرحه كبير وحيل غالي

كن مالي فالحياه الا الشعر نهجٍ وضيفه
من بعد ماغبت وانا كنت اشوفك راس مالي

حالي اللي من زماني صاير شيفته شيفه
خايف اعيشه لحالي و أتركه وانا لحالي !

الشاعر سعود الرساسمة ¹