قصيدة أبوك

أبوك

أبوك قبل الله مع الوقت يِبلاك
قدِّم له الطاعة وأحسِن تأدّبك

وصّاك ربّي والنبي فيه وصّاك
من قبل لا يوصيك بأغلى قرايبك

بتشوف كأنّك حتى ناتج سواياك
لذلك احرِص قبل ربّي يعاقبك

اِسعَ وقول: يا بوي أدوّر رضاك
ما جيتك إلا ودي أسمع مطالبك

ولا تصِدّ لا طرّاك باسمك وناداك
قُل: سمّ وأمِر، لا تِلقِيه غاربك

وش عاد لو يأمرك دايم وينهاك
عيب بوجه أبوك تِعقِد حواجبك

هذا أبوك اللي من المهد ربّاك
حتى قوى عودك وخطّت شواربك

يومك طفل ما تشرب الما بيمناك
كم جيت له ضامي وبيديه شرّبك

يِشيلك إن شافك تَعثّرت بخطاك
يخاف حتى من المشي لا يتعبك

حتى الحكي لا من تلعثم بشفاك
يعلّمك نُطق الحروف ويِدرّبك

يرتاح لا شاف الفرح في محياك
ويزعل على اللي يحرّ قلبك ويِغضبك

يا ما كتم حزنه وهو يسمع بكاك
وإن حسّ ضيقتك ضمّك ولاعبك

وليّا طلبته حاجة قال: تفداك
ما يوم خلّى بخاطرك شي يعجبك

أبوك لا حدّك زمانك على أقصاك
ما صدّ عنك لو تَكاثَر مصايبك

هو الوحيد اللي ليا احتجّ لك جاك
في وقت ما تلقى حبيبك وصاحبك

لا خطيت في حقّه دمح لك خطاياك
حتى لو تِقصّر معه ما يحاسبك

أعطه ولا تبخَل عليه بعطاياك
ولا تنتظر منه يجي لك ويطلبك

برّه ما دامَه عايش الوقت وياك
أخاف لا من مات قلبك يأنّبك

اذا خسرت ابوك خسرت دنياك
رُح عاد حِسّ بوقتها وش مكاسبك

الشاعر سعود العواجي ¹