قصيدة ياربي تسهل الامر الشاعر علي بن حمري

ياربي تسهل الامر

ياربي تسهل الامر وتزين الاحوال
ترانا بلا رحمتك هلكا ومتهاوين

ولا عندنا غيرك ليا صكّ جال جال
ضعوف الأوادم يا قويّ فيك متقوين

أبي رحمتك حيّ وفي القبر والأهوال
نهار الحساب مشيب الرضع الولدين

لنا حقوق وعلينا حقوق وما حطّ يشال
زمان يخلي ضاحكينه من الباكين

ما ينزل به الراحل ويرحل به النزال
ومواعيدنا وآجالنا كل شي بحين

فيا حظّ من طابت فعايله والأعمال
ويا شين حظّ اللي لا وحده ولا ثنتين

هبوب الزمان وكنّته والبراد أشكال
تقلب به الدنيا وأهلها على الجنبين

ولا أشدّ على الصاحيين من كثرة الجهّال
ولا أشدّ على الجهّال من سطوة الصاحيين

عسى الله يصيب مدوّر الشر بالسلال
وعسانا لا ظلام ولا حنّ بمظلومين

ولا نطرد المقفي ولا نكره الإقبال
ولا نخطي ليا صار ما نقبل المخطين

لو إنهم تناسوا فعلنا ما نقص مثقال
من اللي تناسوا جعلهم دايم ناسيين

ولا تذكرونا غير في حزة الأنكال
ليا اشتدت الأزمة وخالط صفا الماء طين

نطب الخطر الموت والخوف طبّ هبال
تقول إننا بمقابل الموت مسترين

بنفنى وتفنى عيالنا بس لا نزال
عزاز النفوس اللي على حقّنا عيين

على الراس طاقية ومن فوقها دِسمال
ومن فوق دِسمالي عقال يميل يمين

ولو ما تحوش إيماننا مال ما ننهال
لو الوقت عاري وجه عشناه مستورين

أبو خمسة لأقل من قيمة أبو ريال
فبو نصف يقدر يقتل أحلام أبو قرشين

ما يوجعك يا السائل سوى جفوة السؤال
ليا صرت تقضي دين ظهرك بمثله دين

ولا فيه بيت سالم من بعض الأشكال
وهدّامته قله وبنايته كثرين

لنا ماضي وحاضر ما نبكي على الأطلال
ما يبكي على الأطلال يا كود محرومين

لهم ماضي حلوى لكن حاضر بطّال
وذولا عرب موتى ولو عادهم حيين

تقلّ العوايد يوم تتعاقب الأجيال
وسلوم الرجال الأوله تتعب التاليين

ولو نذكر اللي راح يا ويل حال وال
بعد روحوا شيباننا الزحل الوافيين

موصينّنا بالصدق في القول والأفعال
وفي جمعة تهتاب من قوّها الطامعين

غدينا شتات وحنّ عيال على رجال
رخصنا والأجناب أصبحوا عندنا غالين

نحبّ الجمل والحمل ونعذرب الجمال
وهو اللي يقود الزمل من وين اليا وين

من أول يوم القلّ والمال ما ينطال
قبل شركة الكهرب تنوّر بيوت الطين

يوم إن الرفيق أغلى من الروح والمنزال
ويوم إن الرفيق إن غاب نفقده فقد شين

وذلحين الأخ يقاطع أخوه حيل وحال
ولا حستّه الأيام ولا غراب البين

أخوي ابن عمّي إن كان ما يردع العيال
ليا عال فيني رحت به في سند الاثنين

أبيعه كذا وأشرب ورا بيعته فنجال
وأنا دون عمري قبل يولد إلى ذلحين

جروح العرب تبرى وجرح الأخو قتّال
وجرح العرب واحد وجرح الأخو جرحين

ولو يبتلى والله ما آخليه لين يهال
علي القبر ولا أنتصف له من الغاوين

يقولون جيبك أكبر إخوانك العقال
وأنا أقول وقفة الأخ تسوى كنوز الصين

عطاني الزمن كل شي إلا مرّه واطفال
عسى الله يكمل زينتي في الحياة آمين

لا تحزن ولا تزعل تماسك وهدّ البال
ترى العاقل اللي يحسب حساب وقته زين

ورفيقك تحمّل له ثلاث لا شكّ ثقال
لكن رابعتِه افطن لها وأخذ حقّ ودين

والأولاد وهبه لا عمام ولا بخوال
عسى الله يصلّح ما عطانا من الجنسين

يا كم بنت هامل جا ولدها بطل الأبطال
وكم بنت شيخ جا ولدها قصير يدين

زكاة العوال معاكستها زكاة المال
لا طاب لك واحد فادفن عوالك الباقيين

الشاعر علي بن حمري ¹