يامدور الهين ترى الكايد أحلى
واسأل مغني كايدات الطروقي
الزين غالي لكن الأزين أغلى
والكل شراي بضاعه وسوقي
النو عالي والسما فوقه أعلى
ولا فاق علم، جاه علم يفوقي
الصعب هلا قلت يا صعب سهلا
دامك تبيني فأنت يا صعب شوقي
أحب أعسف المهره اللي تغلى
وأحب أروض كل طرف يموقي
وأحب أسافر مع سحاب تعلى
وأحب فوق الغيم لمع البروقي
وأحب أساهر بدري اللي تجلى
وأرسم شعاع الشمس عند الشروقي
يا من على ثاير فؤادي تولى
خلك على قلب الكرامه شفوقي
أكرم عزيز بالعمر مستذلا
يسوق عمره للمشاريف سوقي
اخترتك من الناس للقلب خلا
يا حيثك مرادي وكيفي وذوقي
ما رحت أدور كل زول تحلى
لولاك تسوى ما عطيتك خفوقي
