كلمات هاجس الشعر

هاجس الشعر

هاجس الشّعر يجبر صاحبه نظم جيل
خصّ كانه تهيّا فيه شفّ ومجال

ودي أقطف من البستان زهرٍ جميل
يوم حان المجال ويوم حان السّؤال

وجهتي صوب شاعر ينطق السّلسبيّل
الأمير المعرّب من عمامِ وخال

ما تجيب الشّوارد منه غير الجزيل
صيدته دوم جزلة ما يصيد الهزال

مثل وادي إذا ما جاد غيثه يسيل
وقو دفعه يجي ع قدّ علوّ الجبال

طاري الطّيب يذكر جيل من بعد جيل
وإنتَه شخصك يساوي عندنا راس مال

وللكحيله من الفرسان فارس أصيل
يعجبك ضرب سيفه في زحام النّزال

اترك اللّي حياته بين قايل وقيل
واتبع اللّي بفعله كلّ ما قال طال

للدّروب البعيدة شدّ من السّحم حيل
وسط حرّ القوايل ما تدّور ظلال

سمحة الوجه مع غارب وعنقٍ طويل
ما ظمت بسفيها من الجوازي خصال

كلّ ما طال صبري قلت صبرٍ جميل
اصبري يا كتوفٍ ترتكي للثّقال

كلّ جرحٍ وله وقتٍ بطبّه كفيل
وكلّ وقتٍ تخصّه دولةٍ مع رجال

ما تحمل المذلّة غير نفس الذّليل
والنّفوس العزيزة تنفرد بالخصال

أتّكل في حياتي عالكريم الوكيل
وكلّ شيٍ سواه نهايته للزّوال

جرّب الوقت قلبي ثمّ خذ له دليل
بأنّ الإنسان أفضل ميزته الاعتدال

وكلّ شيٍ برايك فيه تقدر تميل
بس باللّي تودّه ما تحبّ الجدال

طلعة البرّ تشفي كلّ قلبٍ عليل
آتلذّذ بجوّه يوم عندي مجال

واجمع الخيط الأصفر مع مباهير هيل
وأغنم بفكّ صوعي عقب فوح الدّلال

في مكانٍ فسيحٍ عصر عقب المقيل
ما مشى في قفاره غير ظبي وغزال

ريت في الشّعر سحر وصار عندي عميل
كلّما زاد حدّه أحكمه بابتهال

خالد عبدالرحمن