أي والله اني من ظروفي تعلمت
بعض البشر لا طحت ما ينفعوني
حتى ولو اني بحاجاتهم قمت
اكيد انا لا احتجتهم يخذلوني
أثري بواجد في حياتي توهمت
ذخرتهم للمعضلات ونسوني
وان كان عانوني ليا من تكلمت
عن ضيقتي هم ليه ما يسألوني
ترا الحياء يفرض على مثلي الصمت
وأن كان ماحسوا أبي يتركوني
ياكثر ماني في رفاقه تندمت
اللي ليامن غبت مايفقدوني
اللي علي وصلي لهم مابعد شمت
وبضيقهم لبيت لو ما دعوني
وحنيت من طيبي عليهم ولزمت
ومديت لو ادري بهم يجحدوني
من طيب راسي من نكرني تبسمت
وعديتها من باب ان ضاقوا يجوني
واليوم من يقدم بخطوه تقدمت
ومن صد حال الصد دونه ودوني
له حق اذا شفته من بعيد سلمت
مابي أجاملهم ولو جاملوني
من قام لي بالواجب بواجبه قمت
ولا علاقات الرخى يعذروني
والحمد لله من ظروفي تعلمت
بعض البشر لو ضقت ماينفعوني
