الا يا من سرق قلبي مع فكري وراح البال
وأنا اللي داري بأني أبد ماني على باله
سرقني سرقة الراهي ولا بقى أبد لي حال
خذا قلبي مع روحي خذا حالي مع حاله
أنا والله حسيب اللي غدالي بالهوى ختال
يخاتل قلبي اللاهي يا لين إنه تهياله!
خذاني من غدا خصره ترسم مثل رسم أهلال
وعود لا تغريف به ينبه من غدا داله
أنا من عينه النعسى عرفت إن الهوى قتال
دخيل الله من رمشه إذا سلهم على فاله!
يناغم خطوته كنه يداعب مشيته خلخال
يغازله الهبوب اللي يلاعب ثوبه وجاله
ثليل العين من حسنه تميز في طرفه الخال
وعنق كنه الريمة ربط قلبي بسلساله
بقى حالي على حالي ولا بقى كثير آمال
ولكنه صحيح اللي سرق قلبه هني ياله
