ويوم استوى الحن الحماسي مع الطاروق
لا سقنا البيوت الفاخرة جات منساقه
عطونا مسامعكم للحظات يأهل الذوق
مادام إن مسامعكم للبداع مشتاقه
تعودت افكر دايما خارج الصندوق
وغدت فكرتي من بين الأفكار خلاقة
انا لا زهقت من المدينة وضول السوق
ضربت الخلا وفياضه الخضر وشقاقه
تشابك غصون الأقحوانة مع الزملوق
بروض مريف وتوها زمت أوراقه
تداعبني انسام الهبايب ايلين اروق
واركد دلالي فوق ضوي على فاقه
لاقامت تكاشح فوق صيهد رماح بروق
وعيون النشاما للنواميس تواقه
قلطنا بأسامينا الكبيرة نظرنا فوق
مافي سلمنا تنكيس رايه ودناقه
للصحاب ريف وللمعادين سم وعوق
وفنجالنا علقم على كبد من ذاقه
زعيم السوالف فالبرامج ووسط السوق
لاجيناه بالوجه الجري عود علاقه
لاقام يتبجح لا ذرابه ولا منطوق
قبل لا نهمش خطته نكشف أوراقه
مع ان الردى بينه وبين الجميل فروق
لذا الدرب عشاقه وذا الدرب عشاقه
وابو وجه مايندى وراعي الغدر والبوق
عجز لا يواجه ضربنا وارسل ابواقه
هذا رمحنا الفاري وذا حدنا المفتوق
وذا جمرنا ذوقوا حميمه وغساقه
نقدر تعبكم لكن الله خلقنا فوق
بيارق نهد دايم على العز خفاقه
نراهن على حر عزومه تسوقه سوق
ما سقنا الرجى في واحد مامعه طاقه
سلامي على اللي كل مدح عليه يلوق
مابه طيب لوجيه المطاليق ما ساقه
أبو عامر اللي فعله ألجم وسد حلوق
أهداهم مياسم حمر ماهدالهم باقه
هذا الفارق الواثق هذا المصدر الموثوق
هذا اللي نجومه في سماء العز شعاقه
هذا مدرسة فن التعامل وحسن الذوق
هذا يوم صكات الوغى يحتمي الساقة
كذب من يقول إن راعي الاوله ملحوق
صعيب على حزب التصاريح ملحاقه
على دحم كتفه ماتجرى ولا مخلوق
تشوف الشبب في وجهه السمح واخلاقه
أبو تم وابشر واحتزم بي لا ناشك عوق
وأبو يا هلا والمرحبا اللي من اعماقه
لوايل لا تحسبها متاحه بدون حقوق
تراها بسم عود ثنى دونها ساقه
يا عبدالله أسهجهم بوضح وساع شدوق
تقول إنها لمعانق الغيم مشتاقه
حلا وانتكاسة ظهر والغارب المنتوق
ورق وسنام منزوي به تفهاقه
خيار ابلنا محتله المركز المرموق
وسمل ابلنا ماهي معى سايق الناقه
كلمات أسامينا الكبيرة الجفراني
