قصيدة ياللي تبي طيحتي مبارك الحجيلان

ياللي تبي طيحتي

قفلت بابك يا المجامل وعزمت
ولا خير في شخصٍ يرد بكلامه

على كثر ما كنت وافي وقدمت
قاموا يحطّوبي عيوب وملامه

بموت ما والله لطيبي تندمت
نادم على المعروف بأهل الرخامة

وميت من الخذلان باللي تعشمت
ومستغرب لطعنة خوي واتهامه

ياما انظلمت ولا بيوم تظلمت
العمر يمضي وآخر العمر خامة

الحين أنا من كل موقف تعلمت
ولا زادت النكبات زدت بفهامة

عرفت بأني لو نجحت وتقدمت
لابد من شخصٍ يصوّب سهامه

وعرفت وين الفرق كاني تحيزمت
رفيق عز ولا رفيق الندامة

وعرفت كيف الصبر يومي تألمت
وكيف إني أهزم ضيقتي فابتسامة

ما قمت أفكر بالبشر وأعمل بصمت
ولا أشوف عدواني أشوف الزعامة

عاهدت نفسي ما تراجع وحرمت
ما ألتفت صوب الردي والهلامة

وابشرك ياللي تبي طيحتي قمت
والله لا أموت ولا تموت الكرامة

تركت لك كل الحكي، ما تكلمت
صمتي يبي يهزمك شهر انهزامه

ببقى أنا مثلي أنا، ما تحطمت
بعامل الصادق بصدق وشهامة

والوافي لا منّه طلب شي تممت
لو أحذف عقالي وأحذف العمامة

والا الرخوم افرح بهم لا تراخمت
ولازم ألاعِبهم مثل لعب دامة

أحقر رفيق اللي معه لو تخاصمت
يبوح بأسرارك ويعلن خصامه

وأوفى رفيق اللي ليا شافك أقدمت
يقدم ومتساوي مقامك مقامه

الغالي لا سلّم من القلب سلمت
ومن باعني برخيص مع السلامة

الشاعر: مبارك الحجيلان ¹