يا هاجسي خلك على المنطق الزين
لا يستفزونك هل المنطق اللي
يرمون لك في ساحة الشعر بيتين
وتحولك من فوق مثل المظلي
بعض الرسائل ماعليها عناوين
يمكن تجيني بالغلط في محلي
والهرج ماله طعم دون البراهين
قال المثل ماكل سكر يحلي
والموتر اللي يحذف يسار ويمين
من سايقه لو قال رمان بلي
ما يدري المنجوم ساري على وين
إلا ليامن الظلام إضمحلي
ما كل من حمر عيونه حمر عين
لو قال في نفسه عساي ولعلي
واللي تساوى عنده الزين والشين
لا تامنه لو كان صايم مصلي
يمكن تشوفه في صفوف المصلين
ويأيد الهندوس تأييد كلي
وحنا بدار مقررين الموازين
دار به الدين الحنيف متجلي
من فضل ربي حاكمينه سلاطين
الكل منهم لا نصيته يهلي
من طيبهم معطيهم الله تمكين
وحظ على كل الحظوظ متعلي
