قصيدة كيف اجازيك

كيف اجازيك

الناس ما خلِقت حواليك ترضيك
مثلك مقادير الولي تَعرضها

أخير لك لا تنّدفع في هقاويك
تلَمّس الأعذار .. ولا تَفترضها

ما فيه شي إلّا ليا راد واليك
ولا فيه صعبه كان ربك فَرضها

اللي ما تِقسّم ما تجي في مراميك
لو كان تِلحِّم بندقك وتحفظها

ورمي الركاده غير رمي التماتيك
والفرق في هذي.. وهذي غرضها

اِكحَل عدوك من سعادة مصافيك
ولا يشغلك غيب القلوب ومرضها

يِظهر صديقك ويتبين معاديك
كذا الحياة بما تلاقيك خِضها

وَسِّع مفاهيمك .. وجود مباديك
وكرامتك عن ما يشوب اِنتهِضها

دايم جناحين المعزّه تِعليك
بالك لحاجات النفوس تِخفضها

إلا الوفا خل الوفا في مساعيك
عملة رجال اعددها وتحفظها

يا صاحبي في وقفتك كيف اجازيك
وأنا أدري إنك ما تدوّر عوضها

ما يجعل الاحرار مثل المماليك
إلا معاريف الرجال ببعضها

الشاعر عكاش العتيبي ¹