قصيدة انقبض قلبي

انقبض قلبي

كلّ ما طاب جرح وطاح سكّينه
جدّ جرحًا جديد ولخبط أوراقه

يوجع الصبر لا اختلّت موازينه
الوجع يظهر الدّمعة من النّاقه

تعب أخوي .. الله يعافيه ويعينه
وأقبلت ذكريات الفقد منساقه

من يجاوب وِرود وغاليه وينه؟
والصّغار أسئلتهم شبه عملاقه

أنا قصّرت عنده بآخر سنينه
والمنايا على الغالين سبّاقه

أنفتح لي رجا يوم افتحت عينه
يوم ناديته باسمه من ورا الطّاقه

ورغم نفسيّته وأخلاقه الشّينه
لا درى إنّي قريّب زانت أخلاقه

وكلّ ما تعب حالوا بيني وبينه
وأتصدّد وأنا ما عاد لي طاقه

إن ذكرت الله أحسّ بطمأنينه
وإن غفلت انقبض قلبي من أعماقه

كلّكم شايلين همّ بنتينه
وأنا ما شلت همّ إلّا من فراقه

الشاعر سلطان بن عباس ¹