قصيدة الأخت نعمة

الأخت نعمة

الأخت نعمة من الله وأنت شاكر نِعَم
الله خلقها معاك وعزّ مَنزالها

جمعت فيها سلالة عِرق دم ولَحم
على فضل والدينك تَعرف أفضالها

لا تظنّها بين أخوانك زيادة رقم
يمكن هي اللِّي تِعِزّ أبوك بأفعالها

لو تَعتزي قُمت تَفخر بها بالإسم
العِزوة اللِّي يِشوش الراس لا قالها

مالك سوى أُختك يطول الهرج أو ينقسم
وهي مالها غير فيك تِعلّق آمالها

إن طِبت طابت معاك وقيل لك والنِّعم
وليا تردّت فِعولك شانت أحوالها

اِحرص عليها قبل يِلحَقك ضيق وندم
لا تقول كَبُرت خلاص ومالي ومالها

من يومها طفلةٍ تِشدّ فيك العزم
من قبل تلبس عبايتها ولا شالها

واليوم يوم كَبُرت تِبيك أخوها الشهم
تِفخر بصيتك وهي في بيت رِجّالها

إن كان ما تِعِزّها وتقول ماهو مهم
لا تِنتظر عِزّها من عمّها وخالها

زودٍ على إنّك أخو الله أمر بالرحِم
واختارك إنّك تكون الخال لعيالها

خَلّك اليّا احتاجتك سيفٍ يِقصّ العظم
ودِرعٍ على كل هرجٍ بالقفا طالها

بادِر بوصلك وحِثّ النفس قبل القدم
اِحذر إذا ضِقت منها تِقطع وصالها

الواجب إنّك تِنشِدّها وهذا العشم
عن كل همٍ تِشوفه مُشغِلٍ بالها

والله لو إنّك تِلفّ الكون كلّه قسم
إنّك ما تِلقى مابين الناس أمثالها

الشاعر سعود العواجي ¹