انا عرفت اميز الطلقه

ماعاد تكفي مرحبا مليون بالصوت الجهور
المرحبا مليون للي بعد ما شاف وعرف

وانا عرفت اميز الطلقه من أول ما تثور
وأنّزِل العالم منازلها، صدر ولا طرف

وأردّها ردّ الكريم اللّي ما يلحقه القصور
لو كان راعيها من اللي لا ضمير ولا شرف

يا الله عليك ولا على هقوة يبور ولا ما يبور
إليا طغو كيّالة الميزان، والعدل انحرف

الألّسن اللّي ما هيب تعرب عن اللّي في الصدور
ما تنؤمن حتى على زاد اليتيم المنغرف

حنّا نعاف اللّقمة الناشبة في كل زور
ومن المعزّة دمّعنا ما هو بعادي ينذرف

وإليّا ظلمنا الحظّ مرّة، ما نلفّ ولا ندور
هذه تبي من يمتّهن دور الذليل ويحترف

العبد غير لوجه ربّي، عبد في كل الأمور
متقلّب الوجهين مثل العملة اللي تنصرّف

والّا الحرار اللّي تصافق بالجناح من الوكور
تاخذ على كَبد السماء حومة قبل ما تنحرف

واللّي انّحرف فيها دليل الفطره اللّي ماتشور
شامت عن الطفسه وعن سيل القطيع المنّجرف

يعوضها عن شجرةٍ حطتّ بها كل الطيور
واكرم ماهو بيسام من شلة مسّاحة الغرف

الشاعر مزيد الوسمي ¹