القلب يكسره اللسان ولا تجبره اليدين

القلب يكسره اللسان

ياذا الجلال اللي نزل على وحيّك الامين
ولك الكواكب مسبّحه ومكبّره

اشملني بعفوك، ولا تجعلني من القانطين
حتى البحر يرجي هطول المزنه المتزبّره

على كثر من ينهزم في معركة غُبر السنين
لله در اللي دسّم شاربه ويغبّره

ما يجعل الرشاش سعره مثل سعر المارتين
الا وقوعه في يد اللي ما يعرف يخبّره

مغامرٍ بغلى ماتنجبه الحروف الكلمتين
مدري تكون معبرة، والّا ماهي بمعبّرة

حتى الهنوف اللي تطالع في الرجال بنص عين
اغض عنها طرف عيني، مقّبله ومدبّره

راودتها مثل الشكوك وجيتها مثل اليقين
يوم اضحكت قلت: الكبر لله، يا متكبّره

واقفيت وانا اكبر من التبرير والعذر السمين
حتّى لو اني خاطري ما كل شي يصبّره

ماني بظالم يوم اقول اقبالها ماهو بزين
الظلم والله كيدها، اللي كل يوم إدبّره

القلب يكسره اللسان، ولا تجبره اليدين
ماهو بعظمٍ كل يومٍ تكسره وتجبّره

ماعاد عندي فرصةٍ تهدر من العمر الثمين
واللي ينشدها من اسباب الفراق تخبّره

ما غاض منها الشامتين الا جمال الشامتين
اللي حداها عن حداها فارقه ومعبّره

من حقها تنثر مدامعها وزان الصورتين
وتعلق الذكرى على بروازها وتكبّره

حيث انه اول شخص يسقط من عيوني مرتين
وانا عيوني من سقط منها ماعاد تعبره

الشاعر صالح النشيرا ¹