قصيدة يالله تغفر لي الشاعر علي بن حمري

يالله تغفر لي

يالله تغفر لي ولا تبلّاني
واجعلني أبيض قلب صافي نيّه

وتعينِي في الماقف الإنسانِي
وتصلح لنا في المال والذريّه

أنتَ اكفِني عن عثرة الصدّقانِي
وكلمة قريباً توجّع النفسيّه

وازهل عليّ مواجهة عدوانِي
روس العدى كرامة الجنبيّه

دايم لساني في اللزوم حصانِي
خيره وشرّه كل أبوها ليّه

أسخّره في خدمة الأوطانِي
وفي مجال الدعوة الدينيّه

ومن دون حكّام البلد له شانِي
ومن دون ربعي وقفته مثنيّه

مرّات ياخذني على خلّانِي
الحبّ وزن الشعر والقافيّه

عندي يساوي قلّة اليابانِي
وما عدّه العسّاف في الماليّه

ياكم وياكم شايبي وصانِي
كم مرّةً يظهر لي المخفيّه

قال العرب كلامها مجّانِي
وأفعالها بالفلس والربيّه

أشهد إنّه شايباً ربّانِي
يا جعلني فدوة تراب أحذيّه

سلام يا تاجاً على التيجانِي
على جباةً طيّبه واتقيّه

عمّي وعمّاً من على عمانِي
وأبوي لو الأسما مهي مسمّيّه

معزّبي ومعزّب الشيخانِي
واسمع سوالف روحي المشقيّه

كبرت جاهي واكثروا ضيفانِي
وقالوا عليّ الربع والعانيّه

وخسارتي تدبّلت واقذانِي
وفقري يقلّ الحيل في يديّه

قالوا عطاه الدرّ والمرجانِي
وقالوا هباله قصر في الشرقيّه

وقالوا رصيدي يبري الوجعانِي
وأنا على سيّارةً كوريّه

هي والشبح وكيلها الوعلانِي
سبحان من فرّق أخاً عن خيّيه

قل للمحيسن ينجز القحطانِي
يصرّف ما يبني له العشره الزوجيّه

يعطيني اليا قلت وإمّا أعطانِي
أظهرت دمعة عيني المخفيّه

لي جيت أبعايد على شيبانِي
حنّيت نفسي من خلا كفّيّه

فقير ويعايد على فقرانِي
أمحق فقر وأمحق بعد عيديّه

يا سعود ماشين موتة الوحدانِي
وإن مات لا هذي ولا هذيّه

من حرّ قيض الأرض في الصّمانِي
يمشي الجمل بالطّاقه الشمسيّه

الشاعر علي بن حمري ¹