يا ضحكة الورع مدري وين شايفها
إن كان ماني متوهم ضحكت فلانة
غمازته وشفته تشبه شفايفها
وعيونه عيونها يضحك ونعسانة
والله يا ضحكته عجز أطوفها
اللي شغلني معه من جملة إخوانه
وقفت والنفس ما بدت حسايفها
ضيعت وقتي غصب كله على شانه
أنشده والبشر تتبع ولايفها
يلعب طرب بالملاهي بين ورعانه
صديت والعين ما تنسى وصايفها
هذيك نفسي عليها حيل شفقانة
وا نفس يا اللي تحلفني وأحلفها
حاولت أشكك وهي ماهيب غلطانة
تقول هل الورع والله من خلايفها
وأقول ربي يخلق أشباه سبحانه
هذيك راحة وأنا ماني بعايفها
حكم المقدر وكلن راح في شانه
خبريبها يوم جاها من طويفها
اللي خذاها ويتبع سلم جدانه
ما شافته ولا هو ماهو بعارفها
ما شاورها أبد ما كنها إنسانة
راحت وأنا بشقى كني مناصفها
يا مل قلبن شكى همه وحرمانه
لليوم قلبي يردد لي سوالفها
هذيك نفسي عليها حيل شفقانة