ياروح الدار وأنفاس القصيد ونسمة الأشعار
يا حلمي الأول اللي عشت فيه وحلمي الآتي
حبيبة قلبي اللي تعزف بقلبي لحن وأوتار
على خطواتها وأنفاسها تعزف كتاباتي
تعالي يا بعد روح المدينة والبشر والدار
تعالي واسكني في وسط صدري واسكني ذاتي
أحبك وأعشقك واخترتك وقلبي هو المختار
يا طيب الحظ في قربك ويا طيب اختياراتي
أحبك كثر ما رفرف جناح العشق فيك وطار
وأحبك كثر ما مرت طيوفك في خيالاتي
وأحبك كثر ما في طلتك حب ورضى وأنوار
وأحبك كثر ما وجهت لك كل اتجاهاتي
وأحبك كثر ما هب الهوى الغربي على الأشجار
وأحبك كثر ما سارت على لقياك خطواتي
لو أخسر كل هالدنيا وأهلها انتي الأقدار
أنا اللي منتصر في شوفتك يا أغلى انتصاراتي
غرامك يجري بدمي مثل ما تجري الأنهار
ووجودك يحيي عروق الغلا ويلملم شتاتي
من اللي ما تغار إن شافتك؟ حتى النجوم تغار
في عتم الليل يسطع نور وجهك فالدجى العاتي
يقولون العمر مشوار وانتي غاية المشوار
لآخر يوم في عمري وقربك كل غاياتي
معك وأعاهدك ما أخون حبك والعهود كبار
هذا عهد الوفاء مني وهذي أعذب أبياتي
