على حسب ما مرني ومن تجارب الأولين
وجهة نظر ويجوز فيها الاتفاق والانقسام

اترك مسافه كافيه بينك وبين الآخرين
بعض البشر ودك حدود المعرفه معهم سلام

واصمت ولا تحرص على كثر الكلام الصمت زين
اللي سكوته ساتره يمكن يعريه الكلام

وإذا تكلمت احذر تكون أطول المتكلمين
السالفه لا طولت يضعف معاها الاهتمام

أمزح ومزح باللسان أخير من مزح اليدين
مزح الرجال العاقله على حدود الاحترام

اضحك ولا تضحك برفع الصوت رفع الصوت شين
من الأدب والذوق عند الضحك ضحك بابتسام

اكرم وبيبان الكرم واجد ولا يحتاج دين
ترى الرجال إكرامها ما هوب كثر الطعام

احلم ولا تعجل ولا تغضب ولا تشري بدين
وشاور ولو رأيك معك لا شريت عداك الملام

وإذا شريت بدين لا تبطي على المتجملين
كل حلاله غالي عنده لو إنه ما يسام

لا جاك مديونك معه بعض الوفا وبعضه لحين
فاستد باللي جاك وش دراك لله الدوام

ترى التغافل فيه لذه وانشد المتغافلين
لا جاتك كلمه توجع أطلقها مع سرب الحمام

ارضى ليا جاك الرضى لو العذر ما هو سمين
ترى التسامح ميزة الساده رفيعين المقام

وصادق وإذا صادقت ما جربت ما صادقت لين
أما يطول بك السهر ولا يطيب لك المنام

اصدق مع نفسك وتلقى نفسك من الصادقين
والنفس خيل إبليس لا تعطيه نفسك واللجام

أليا نصحت انصح خفى لا تفضحه في الحاضرين
ترى الرجال يقودها لين الحكي قود الخطام

ولا اتواضع في حضور العالم المتكبرين
تعامل بنفس الطريقه معهم ونفس النظام

وأخلاقك وتواضعك عامل بها المتواضعين
نصف الأدب مجامله جامل ولا تجامل لئام

وإذا تسولف عن طموحاتك مع المتفرغين
كنك تسولف للنصارى في الحلال وفي الحرام

والعمر ما هو فرصه وحده ولا هو بفرصتين
مع كل مطلع شمس لك فرصه وخطوه للأمام

هاذا ولا زلنا تعلمنا الليالي والسنين
والعلم خير من الجهل والنور جلاي الظلام

قصيدة بعض البشر عبدالله علوش

الشاعر عبدالله علوشزيارة المصدر